ನವದೆಹಲಿ: ಸೋಶಿಯಲ್ ಮೀಡಿಯಾದಲ್ಲಿ ವಿಡಿಯೋ ಪೋಸ್ಟ್ ಮಾಡಿ ಹಣ ಗಳಿಸಬೇಕು ಎಂದುಕೊಂಡಿರುವ ಕಂಟೆಂಟ್ ಕ್ರಿಯೇಟರ್‌ಗಳಿಗೆ ಇಲ್ಲೊಂದು ಹೊಸ ಅವಕಾಶವಿದೆ. ಎಲಾನ್ ಮಸ್ಕ್ ಮಾಲೀಕತ್ವದ X ‘Video Kickstart Bonus’ ಹೆಸರಿನ ಹೊಸ ಬೋನಸ್ ಯೋಜನೆಯನ್ನು ಪ್ರಾಯೋಗಿಕವಾಗಿ ಆರಂಭಿಸಿದೆ. ಈ ಯೋಜನೆಗೆ ಆಯ್ಕೆಯಾದ ಕ್ರಿಯೇಟರ್‌ಗಳು ನಿಗದಿತ ನಿಯಮಗಳ ಪ್ರಕಾರ ಸ್ವಂತ ವಿಡಿಯೋಗಳನ್ನು ಪೋಸ್ಟ್ ಮಾಡಿದರೆ 3,000 ಡಾಲರ್‌ವರೆಗೆ, ಅಂದರೆ ಸುಮಾರು ₹2.85 ಲಕ್ಷ ಬೋನಸ್ ಪಡೆಯುವ ಅವಕಾಶವಿದೆ.
ಈ ಯೋಜನೆಯ ವಿಶೇಷತೆ ಏನೆಂದರೆ, ಬೋನಸ್ ಪಡೆಯಲು ವಿಡಿಯೋಗಳಿಗೆ ನಿರ್ದಿಷ್ಟ ಸಂಖ್ಯೆಯ ವೀಕ್ಷಣೆಗಳು ಬರಲೇಬೇಕು ಎಂಬ ಷರತ್ತಿಲ್ಲ. ಆದರೆ, ಈ ಸೌಲಭ್ಯ ಎಲ್ಲರಿಗೂ ಮುಕ್ತವಾಗಿಲ್ಲ. Xನಿಂದ ಆಹ್ವಾನ ಪಡೆದ ಆಯ್ದ ಕ್ರಿಯೇಟರ್‌ಗಳು ಮಾತ್ರ ಇದರಲ್ಲಿ ಭಾಗವಹಿಸಬಹುದು.
ವೀಕ್ಷಣೆಗಳ ಸಂಖ್ಯೆ ಮುಖ್ಯವಲ್ಲ!
ಸಾಮಾನ್ಯವಾಗಿ ಯೂಟ್ಯೂಬ್ ಸೇರಿದಂತೆ ಹಲವು ಪ್ಲಾಟ್‌ಫಾರ್ಮ್‌ಗಳಲ್ಲಿ ಹಣ ಗಳಿಸಲು ನಿರ್ದಿಷ್ಟ ಅರ್ಹತೆಗಳು ಮತ್ತು ವೀಕ್ಷಣೆ ಆಧಾರಿತ ನಿಯಮಗಳನ್ನು ಪೂರೈಸಬೇಕಾಗುತ್ತದೆ. ಆದರೆ Xನ ಹೊಸ Video Kickstart Bonus ಯೋಜನೆಯಲ್ಲಿ ಮುಖ್ಯವಾಗಿ ಗಮನ ನೀಡಿರುವುದು ಕ್ರಿಯೇಟರ್‌ಗಳು ನಿಯಮಿತವಾಗಿ ಸ್ವಂತ ವಿಡಿಯೋಗಳನ್ನು ಪೋಸ್ಟ್ ಮಾಡುತ್ತಿದ್ದಾರೆಯೇ ಎಂಬುದಕ್ಕೆ.
ಆದರೆ, ವಿಡಿಯೋ ಪೋಸ್ಟ್ ಮಾಡಿದ ತಕ್ಷಣವೇ ಹಣ ಸಿಗುತ್ತದೆ ಎಂದರ್ಥವಲ್ಲ. ನಿಗದಿತ ನಿಯಮಗಳನ್ನು ಪೂರೈಸಿದ ಬಳಿಕ X ವಿಡಿಯೋಗಳನ್ನು ಪರಿಶೀಲಿಸುತ್ತದೆ. ಅರ್ಹತೆ ದೃಢಪಟ್ಟರೆ ಬೋನಸ್ ಪಾವತಿಸಲಾಗುತ್ತದೆ. ಬೋನಸ್ ಮೊತ್ತದ ವಿವರವನ್ನು ಆಹ್ವಾನ ಮತ್ತು Creator Studioನಲ್ಲಿ ಪರಿಶೀಲಿಸಬಹುದು.
ಈ ಮೂರು ಪ್ರಮುಖ ನಿಯಮಗಳನ್ನು ಪಾಲಿಸಬೇಕು
ಈ ಯೋಜನೆಯಲ್ಲಿ ಭಾಗವಹಿಸಲು ಆಹ್ವಾನ ಪಡೆದ ಕ್ರಿಯೇಟರ್‌ಗಳು ಮುಖ್ಯವಾಗಿ ಈ ನಿಯಮಗಳನ್ನು ಪಾಲಿಸಬೇಕು.
1. ವಿಡಿಯೋ 3 ನಿಮಿಷಕ್ಕಿಂತ ಕಡಿಮೆ ಇರಬೇಕು
ವಿಡಿಯೋ ವರ್ಟಿಕಲ್ ಫಾರ್ಮ್ಯಾಟ್‌ನಲ್ಲಿ, ಅಂದರೆ 9:16 ಅನುಪಾತದಲ್ಲಿ ಇರಬೇಕು. ಅದರ ಅವಧಿ ಮೂರು ನಿಮಿಷಕ್ಕಿಂತ ಕಡಿಮೆ ಇರಬೇಕು.
2. ಸ್ವಂತ ವಿಡಿಯೋ ಆಗಿರಬೇಕು
ಕ್ರಿಯೇಟರ್ ಸ್ವತಃ ರಚಿಸಿದ ವಿಡಿಯೋಗಳನ್ನೇ ಪೋಸ್ಟ್ ಮಾಡಬೇಕು. ಇನ್‌ಸ್ಟಾಗ್ರಾಮ್, ಯೂಟ್ಯೂಬ್ ಅಥವಾ ಇತರ ಪ್ಲಾಟ್‌ಫಾರ್ಮ್‌ಗಳಲ್ಲಿ ಈ ಹಿಂದೆ ಪೋಸ್ಟ್ ಮಾಡಿದ ತಮ್ಮದೇ ವಿಡಿಯೋಗಳನ್ನು ಬಳಸಬಹುದು. ಆದರೆ, ಅವುಗಳಲ್ಲಿ ಬೇರೆ ಪ್ಲಾಟ್‌ಫಾರ್ಮ್‌ನ ವಾಟರ್‌ಮಾರ್ಕ್, ಹೆಸರು ಅಥವಾ ಲೋಗೋ ಇರಬಾರದು. ಇತರರ ವಿಡಿಯೋಗಳನ್ನು ಡೌನ್‌ಲೋಡ್ ಮಾಡಿ ತಮ್ಮದೇ ಎಂದು ಪೋಸ್ಟ್ ಮಾಡಿದರೆ ಅವು ಅರ್ಹವಾಗುವುದಿಲ್ಲ.
3. 30 ದಿನಗಳಲ್ಲಿ 15 ಬೇರೆ ದಿನಗಳಲ್ಲಿ ಪೋಸ್ಟ್ ಮಾಡಬೇಕು
30 ದಿನಗಳ ಅವಧಿಯಲ್ಲಿ ಕನಿಷ್ಠ 15 ವಿಡಿಯೋಗಳನ್ನು, 15 ವಿಭಿನ್ನ ದಿನಗಳಲ್ಲಿ ಪೋಸ್ಟ್ ಮಾಡಬೇಕು. ಒಂದೇ ದಿನ 15 ವಿಡಿಯೋಗಳನ್ನು ಅಪ್‌ಲೋಡ್ ಮಾಡಿದರೆ ಈ ಷರತ್ತು ಪೂರೈಸಿದಂತಾಗುವುದಿಲ್ಲ. ಪ್ರತಿದಿನವೂ ಪೋಸ್ಟ್ ಮಾಡಬೇಕೆಂದಿಲ್ಲ; ಆದರೆ ಒಟ್ಟು 15 ವಿಭಿನ್ನ ದಿನಗಳಲ್ಲಿ ಅರ್ಹ ವಿಡಿಯೋ ಪೋಸ್ಟ್ ಮಾಡಿರಬೇಕು.
ಅಕ್ಟೋಬರ್ 30ರೊಳಗೆ ನೋಂದಣಿ ಮಾಡಿಕೊಳ್ಳಬೇಕು
Xನಿಂದ ಈ ಯೋಜನೆಗೆ ಆಹ್ವಾನ ಪಡೆದ ಕ್ರಿಯೇಟರ್‌ಗಳು ಮೊದಲ ಹಂತದಲ್ಲಿ 2026ರ ಅಕ್ಟೋಬರ್ 30ರೊಳಗೆ ನೋಂದಣಿ (ಎನ್‌ರೋಲ್‌ಮೆಂಟ್) ಪೂರ್ಣಗೊಳಿಸಬೇಕು. ಆಹ್ವಾನ ಪಡೆದವರು Xನ Creator Studioಗೆ ಹೋಗಿ ‘Programs’ ವಿಭಾಗದಲ್ಲಿ Video Kickstart Bonus ಆಯ್ಕೆಯನ್ನು ಪರಿಶೀಲಿಸಬಹುದು.
ನೋಂದಣಿ ಮಾಡಿದ ಬಳಿಕವೇ ಅರ್ಹ ವಿಡಿಯೋಗಳ ಲೆಕ್ಕಾಚಾರ ಆರಂಭವಾಗುತ್ತದೆ. ಹೀಗಾಗಿ ಕೊನೆಯ ದಿನದವರೆಗೆ ಕಾಯದೆ, ಆಹ್ವಾನ ಬಂದಿದ್ದರೆ ಅದರಲ್ಲಿರುವ ಸೂಚನೆಗಳ ಪ್ರಕಾರ ನೋಂದಣಿ ಮಾಡಿಕೊಳ್ಳುವುದು ಉತ್ತಮ.
ಎಲ್ಲರೂ ಅರ್ಜಿ ಸಲ್ಲಿಸಬಹುದಾ?
ಇಲ್ಲ. ಈ ಯೋಜನೆ ಸದ್ಯಕ್ಕೆ ಆಹ್ವಾನ ಆಧಾರಿತ ಪ್ರಾಯೋಗಿಕ ಯೋಜನೆಯಾಗಿದೆ. X ಸಂಸ್ಥೆಯೇ ಆಯ್ದ ಕ್ರಿಯೇಟರ್‌ಗಳಿಗೆ ಆಹ್ವಾನ ಕಳುಹಿಸುತ್ತದೆ. ಯಾರಿಗೆ ಆಹ್ವಾನ ನೀಡಲಾಗುತ್ತದೆ ಎಂಬುದರ ಸಂಪೂರ್ಣ ಮಾನದಂಡಗಳನ್ನು ಸಾರ್ವಜನಿಕವಾಗಿ ಬಹಿರಂಗಪಡಿಸಿಲ್ಲ.
ಇದು Xನಲ್ಲಿರುವ ಮತ್ತೊಂದು ‘Original Content Rewards’ ಯೋಜನೆಗಿಂತ ಭಿನ್ನವಾಗಿದೆ. ಆ ಯೋಜನೆಗೆ ಪ್ರತ್ಯೇಕ ಅರ್ಹತಾ ನಿಯಮಗಳಿವೆ. Video Kickstart Bonusನಲ್ಲಿ ಭಾಗವಹಿಸಲು ಆಹ್ವಾನ ಪಡೆದವರು ತಮ್ಮ Creator Studioನಲ್ಲಿರುವ ನಿಯಮಗಳನ್ನೇ ಪರಿಶೀಲಿಸಬೇಕು.
ಒಟ್ಟಿನಲ್ಲಿ, ವಿಡಿಯೋ ಕ್ರಿಯೇಟರ್‌ಗಳಿಗೆ X ಹೊಸ ರೀತಿಯ ಆದಾಯದ ಅವಕಾಶವನ್ನು ಪರಿಚಯಿಸಿದೆ. ಆದರೆ, ₹2.85 ಲಕ್ಷ ಎಲ್ಲರಿಗೂ ಸಿಗುವ ಖಚಿತ ಹಣವಲ್ಲ. ಆಹ್ವಾನ ಪಡೆದವರು ಮಾತ್ರ, ತಮಗೆ ನಿಗದಿಪಡಿಸಿದ ಬೋನಸ್ ಮೊತ್ತ ಮತ್ತು ನಿಯಮಗಳನ್ನು ಪೂರೈಸಿದ ಬಳಿಕ ಹಣ ಪಡೆಯಲು ಅರ್ಹರಾಗುತ್ತಾರೆ.
