ಬಾಲ್ಯದಲ್ಲಿ ತುಂಬಾ ಆಸಕ್ತಿಯಿಂದ ಆಡುತ್ತಿದ್ದ ಕ್ಯಾಂಡಿ ಕ್ರಷ್ ಸಾಗಾ ಆಟ ನಿಮಗೆ ನೆನಪಿದೆಯೇ? ಇದೇ ಮೋಜಿನ ಮೊಬೈಲ್ ಗೇಮ್ ಇದೀಗ 19 ವರ್ಷದ ಯುವಕನೊಬ್ಬನಿಗೆ ಅಂತರರಾಷ್ಟ್ರೀಯ ಮನ್ನಣೆ ತಂದುಕೊಟ್ಟಿದೆ. ಬಿಹಾರದ ಶುಭಂ ಕುಮಾರ್ ಎಂಬ ಯುವಕ ಕ್ಯಾಂಡಿ ಕ್ರಷ್ ಸಾಗಾದಲ್ಲಿ ಬರೋಬ್ಬರಿ 22,222 ಹಂತಗಳನ್ನು ಪೂರ್ಣಗೊಳಿಸಿ ದಾಖಲೆ ನಿರ್ಮಿಸಿದ್ದಾರೆ.
ಫೋನ್‌ನಲ್ಲಿ ಸಮಯ ಕಳೆಯಲು ಆಡುತ್ತಿದ್ದ ಆಟವೇ ಇದೀಗ ಶುಭಂ ಅವರಿಗೆ ವಿಶೇಷ ಗುರುತನ್ನು ತಂದುಕೊಟ್ಟಿದೆ. ಅವರ ಈ ಸಾಧನೆಯನ್ನು ಅಂತರರಾಷ್ಟ್ರೀಯ ದಾಖಲೆಗಳ ಪುಸ್ತಕ ಗುರುತಿಸಿದ್ದು, ಹದಿಹರೆಯದವರ ವಿಭಾಗದಲ್ಲಿ ಕ್ಯಾಂಡಿ ಕ್ರಷ್‌ನಲ್ಲಿ ಅತಿ ಹೆಚ್ಚು ಹಂತಗಳನ್ನು ಪೂರ್ಣಗೊಳಿಸಿದ ವ್ಯಕ್ತಿ ಎಂದು ದಾಖಲಿಸಿದೆ.
ಅಂತರರಾಷ್ಟ್ರೀಯ ದಾಖಲೆಗಳ ಪುಸ್ತಕದ ವೆಬ್‌ಸೈಟ್ ಪ್ರಕಾರ, ಬಿಹಾರದ ದಿಗ್ವಾರ ಗ್ರಾಮದ ಶುಭಂ ಕುಮಾರ್ ಅವರು 2026ರ ಜುಲೈ 5ರಂದು ಈ ಮೈಲಿಗಲ್ಲು ತಲುಪಿದ್ದಾರೆ. ಆ ಸಂದರ್ಭದಲ್ಲಿ ಅವರ ವಯಸ್ಸು 19 ವರ್ಷ, 8 ತಿಂಗಳು ಮತ್ತು 25 ದಿನಗಳು ಎಂದು ದಾಖಲೆಗಳಲ್ಲಿ ಉಲ್ಲೇಖಿಸಲಾಗಿದೆ.
ಆದರೆ, 22,222 ಹಂತಗಳನ್ನು ಪೂರ್ಣಗೊಳಿಸಲು ಶುಭಂ ಅವರಿಗೆ ಒಟ್ಟು ಎಷ್ಟು ದಿನಗಳು ಬೇಕಾಯಿತು ಎಂಬ ಮಾಹಿತಿ ದಾಖಲೆಗಳಲ್ಲಿ ನೀಡಲಾಗಿಲ್ಲ. ಆದರೂ, ಮನರಂಜನೆಗಾಗಿ ಆಡುತ್ತಿದ್ದ ಆಟವೇ ಇದೀಗ ಅವರಿಗೆ ಅಂತರರಾಷ್ಟ್ರೀಯ ಮಟ್ಟದಲ್ಲಿ ಗುರುತನ್ನು ತಂದುಕೊಟ್ಟಿದೆ.
ಕ್ಯಾಂಡಿ ಕ್ರಷ್ ಅಷ್ಟೊಂದು ಸುಲಭದ ಆಟವಲ್ಲ!
ಕ್ಯಾಂಡಿ ಕ್ರಷ್ ಸಾಗಾ ಒಂದು ಜನಪ್ರಿಯ ಪಝಲ್ ಗೇಮ್. ಇದರಲ್ಲಿ ವಿವಿಧ ಬಣ್ಣಗಳ ಕ್ಯಾಂಡಿಗಳನ್ನು ಒಂದೇ ಬಣ್ಣದ ಮೂರು ಅಥವಾ ಅದಕ್ಕಿಂತ ಹೆಚ್ಚು ಕ್ಯಾಂಡಿಗಳನ್ನು ಒಟ್ಟಿಗೆ ಜೋಡಿಸಿ ಗುರಿ ಸಾಧಿಸಬೇಕು.
ಆರಂಭದಲ್ಲಿ ಆಟ ಸುಲಭವಾಗಿ ಕಾಣಿಸಿದರೂ, ಹಂತಗಳು ಹೆಚ್ಚಾದಂತೆ ಸವಾಲುಗಳೂ ಕಠಿಣವಾಗುತ್ತವೆ. ಪ್ರತಿ ಹಂತದಲ್ಲೂ ಹೊಸ ಟಾಸ್ಕ್‌ಗಳು ಎದುರಾಗುತ್ತವೆ. ಅವುಗಳನ್ನು ಪೂರ್ಣಗೊಳಿಸಲು ಗಮನ, ತಾಳ್ಮೆ ಮತ್ತು ತಂತ್ರ ಬೇಕಾಗುತ್ತದೆ.
ಇಂತಹ ಸಾವಿರಾರು ಹಂತಗಳನ್ನು ದಾಟಿ 22,222ನೇ ಹಂತದವರೆಗೆ ತಲುಪಿರುವ ಶುಭಂ ಕುಮಾರ್ ಅವರ ಸಾಧನೆ, ಗೇಮ್ ಆಡುವವರಲ್ಲೇ ಈಗ ಕುತೂಹಲ ಮೂಡಿಸಿದೆ.
