ಕಠ್ಮಂಡು: ನೇಪಾಳದಲ್ಲಿ ಭೀಕರ ಪ್ರವಾಹದ ಪರಿಣಾಮ ಸಾವಿನ ಸಂಖ್ಯೆ ಸುಮಾರು 552ಕ್ಕೆ ಏರಿಕೆಯಾಗಿದೆ. ಹಲವು ಪ್ರದೇಶಗಳಲ್ಲಿ ಶೋಧ ಮತ್ತು ರಕ್ಷಣಾ ಕಾರ್ಯಾಚರಣೆ ಮುಂದುವರಿದಿದೆ. ಈ ನಡುವೆ ವಿದೇಶಗಳಿಂದ ಬರುತ್ತಿರುವ ರಕ್ಷಣಾ ತಂಡಗಳ ಸಹಾಯವನ್ನು ಸದ್ಯಕ್ಕೆ ಸ್ವೀಕರಿಸದಿರಲು ನೇಪಾಳ ಸರ್ಕಾರ ನಿರ್ಧರಿಸಿದೆ.
ಭಾರತದ NDRF, ಚೀನಾ ಹಾಗೂ ಅಮೆರಿಕದಿಂದ ಬಂದಿದ್ದ ಸಹಾಯದ ಪ್ರಸ್ತಾವವನ್ನು ನೇಪಾಳ ಸದ್ಯಕ್ಕೆ ನಿರಾಕರಿಸಿದೆ. ಯುಕೆ, ಜಪಾನ್, ದಕ್ಷಿಣ ಕೊರಿಯಾ, ಶ್ರೀಲಂಕಾ ಮತ್ತು ಬಾಂಗ್ಲಾದೇಶ ಕೂಡ ನೆರವು ನೀಡಲು ಮುಂದೆ ಬಂದಿವೆ.
ಆದರೆ ನೇಪಾಳ ಸರ್ಕಾರ “ಸದ್ಯಕ್ಕೆ ರಕ್ಷಣಾ ತಂಡಗಳ ಅಗತ್ಯವಿಲ್ಲ. ಸಾಧ್ಯವಾದರೆ ಹಣಕಾಸಿನ ನೆರವು ನೀಡಿ” ಎಂದು ಮನವಿ ಮಾಡಿದೆ. ಪ್ರವಾಹದಂತಹ ದೊಡ್ಡ ದುರಂತವನ್ನು ಎದುರಿಸಲು ದೇಶದ ಭದ್ರತಾ ಮತ್ತು ರಕ್ಷಣಾ ವ್ಯವಸ್ಥೆ ಸದ್ಯ ಸಮರ್ಥವಾಗಿದೆ ಎಂದು ನೇಪಾಳ ತಿಳಿಸಿದೆ.
2015ರ ಭೂಕಂಪದ ಸಂದರ್ಭದಲ್ಲಿ ಹಲವು ದೇಶಗಳ ರಕ್ಷಣಾ ತಂಡಗಳು ನೇಪಾಳಕ್ಕೆ ಆಗಮಿಸಿದ್ದವು. ಆಗ ವಿವಿಧ ತಂಡಗಳ ನಡುವೆ ಸಮನ್ವಯ ಸಾಧಿಸುವುದು ಸರ್ಕಾರಕ್ಕೆ ದೊಡ್ಡ ಸವಾಲಾಗಿತ್ತು. ಇದೇ ಕಾರಣದಿಂದ ಈ ಬಾರಿ ವಿದೇಶಿ ರಕ್ಷಣಾ ತಂಡಗಳನ್ನು ನೇರವಾಗಿ ಕರೆಸಿಕೊಳ್ಳುವ ಬದಲು ಅಗತ್ಯವಿದ್ದಾಗ ಮಾತ್ರ ಸಹಾಯ ಪಡೆಯಲು ನೇಪಾಳ ಮುಂದಾಗಿದೆ ಎನ್ನಲಾಗಿದೆ.
ಇದರ ನಡುವೆ ಭಾರತದ ನೆರವು ಮಾತ್ರ ಮುಂದುವರಿದಿದೆ. ನೇಪಾಳದ ಮನವಿಯ ಮೇರೆಗೆ ಭಾರತ ವೈದ್ಯಕೀಯ ತಂಡ, ಎಂಜಿನಿಯರಿಂಗ್ ತಂಡ ಹಾಗೂ ಮೂಲಸೌಕರ್ಯ ಪುನರ್ನಿರ್ಮಾಣಕ್ಕೆ ಅಗತ್ಯ ನೆರವು ನೀಡಲು ಸಿದ್ಧವಾಗಿದೆ ಎಂದು ವಿದೇಶಾಂಗ ಸಚಿವಾಲಯ ತಿಳಿಸಿದೆ.
ಈಗಾಗಲೇ ಪರಿಹಾರ ಸಾಮಗ್ರಿಗಳನ್ನು ಹೊತ್ತ ಭಾರತದ ಎರಡು ವಿಮಾನಗಳು ನೇಪಾಳ ತಲುಪಿವೆ. ಮತ್ತೊಂದು ವಿಮಾನವೂ ಶೀಘ್ರದಲ್ಲೇ ತೆರಳಲಿದೆ. ಜೊತೆಗೆ ಸುರಂಗ ರಕ್ಷಣಾ ತಂಡವನ್ನು ಕಳುಹಿಸಲು ಭಾರತ ಸಿದ್ಧತೆ ನಡೆಸುತ್ತಿದೆ. ಅದಕ್ಕೂ ಮೊದಲು ಪರಿಸ್ಥಿತಿ ಪರಿಶೀಲಿಸಲು ತಂಡವೊಂದನ್ನು ಕಳುಹಿಸಲಾಗುತ್ತಿದೆ.
ಶೋಧ ಮತ್ತು ರಕ್ಷಣಾ ಕಾರ್ಯಾಚರಣೆಗೆ NDRF ತಂಡಗಳನ್ನು ಕಳುಹಿಸುವ ಪ್ರಸ್ತಾವವನ್ನೂ ಭಾರತ ನೇಪಾಳದ ಅಧಿಕಾರಿಗಳಿಗೆ ನೀಡಿದೆ. ಆದರೆ ಈ ಬಗ್ಗೆ ನೇಪಾಳ ಸರ್ಕಾರದ ಅಂತಿಮ ಪ್ರತಿಕ್ರಿಯೆಗಾಗಿ ಭಾರತ ಕಾಯುತ್ತಿದೆ.
ನೇಪಾಳದ ವಿದೇಶಾಂಗ ಸಚಿವಾಲಯದ ವಕ್ತಾರ ಲೋಕ್ ಬಹದ್ದೂರ್ ಛೆಟ್ರಿ ಕೂಡ ಇದೇ ವಿಚಾರವನ್ನು ಸ್ಪಷ್ಟಪಡಿಸಿದ್ದಾರೆ. “ನಮಗೆ ಸಹಾಯ ಬೇಡ ಎಂದಲ್ಲ. ಆದರೆ ನಮ್ಮ ಭದ್ರತಾ ವ್ಯವಸ್ಥೆ ಈಗ ಸಮರ್ಥವಾಗಿದೆ. ವಿಶೇಷ ಪರಿಣತಿ ಅಥವಾ ಸಹಾಯದ ಅಗತ್ಯ ಬಂದರೆ ನಾವು ಕೇಳುತ್ತೇವೆ” ಎಂದು ಅವರು ಹೇಳಿದ್ದಾರೆ.
ಸದ್ಯ ನೇಪಾಳದ ಹಲವು ಭಾಗಗಳಲ್ಲಿ ಪರಿಸ್ಥಿತಿ ಗಂಭೀರವಾಗಿದ್ದು, ರಕ್ಷಣಾ ಕಾರ್ಯಾಚರಣೆಯ ಜೊತೆಗೆ ಪರಿಹಾರ ಮತ್ತು ಪುನರ್ನಿರ್ಮಾಣದ ಸವಾಲು ಕೂಡ ಸರ್ಕಾರದ ಮುಂದಿದೆ.
