ರಾಜಸ್ಥಾನದ ಕುರ್ತಾಲ್‌ ಗ್ರಾಮದ ಜನರಿಗೆ ಇದು ಸಾಮಾನ್ಯ ಬಸ್ ಆಗಮನವಾಗಿರಲಿಲ್ಲ. ಸ್ವಾತಂತ್ರ್ಯ ಬಂದ ಸುಮಾರು 79 ವರ್ಷಗಳ ಬಳಿಕ ಮೊದಲ ಬಾರಿಗೆ ಸರ್ಕಾರಿ ಬಸ್ ಗ್ರಾಮಕ್ಕೆ ಬಂದಿದ್ದು, ಗ್ರಾಮಸ್ಥರು ಹಬ್ಬದಂತೆ ಸಂಭ್ರಮಿಸಿದ್ದಾರೆ.
ಬಸ್ ಗ್ರಾಮಕ್ಕೆ ಬರುತ್ತಿದ್ದಂತೆ ರಸ್ತೆಯ ಎರಡೂ ಬದಿಯಲ್ಲಿ ಜನರು ಜಮಾಯಿಸಿದ್ದರು. ಹೂವುಗಳನ್ನು ಸುರಿಸಿ, ಆರತಿ ಮಾಡಿ, ಪಟಾಕಿ ಸಿಡಿಸಿ ಬಸ್ ಅನ್ನು ಸ್ವಾಗತಿಸಿದ್ದಾರೆ. ಡ್ರಮ್‌ಗಳ ಸದ್ದಿಗೆ ಹಲವರು ಕುಣಿದು ಸಂಭ್ರಮಿಸಿದ್ದಾರೆ.
ಬಸ್‌ನ ಚಾಲಕ ಮತ್ತು ಕಂಡಕ್ಟರ್‌ಗೂ ಪೇಟ ತೊಡಿಸಿ, ಹೂಮಾಲೆ ಹಾಕಿ ಗೌರವಿಸಲಾಗಿದೆ. ಮಳೆಯ ನಡುವೆಯೂ ಗ್ರಾಮಸ್ಥರು ಬಸ್ ಸ್ವಾಗತಿಸಲು ಕಾದು ನಿಂತಿದ್ದ ದೃಶ್ಯಗಳು ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್‌ ಆಗಿವೆ.
ಕುರ್ತಾಲ್‌ ಹಾಗೂ ನೆರೆಯ ಕೆರೋಟ್‌ ಗ್ರಾಮಗಳು ಹಲವು ವರ್ಷಗಳಿಂದ ಸರ್ಕಾರಿ ಬಸ್ ಸಂಪರ್ಕದಿಂದ ದೂರವೇ ಉಳಿದಿದ್ದವು. ಇದರಿಂದ ಗ್ರಾಮಸ್ಥರು ಖಾಸಗಿ ವಾಹನಗಳನ್ನು ಅವಲಂಬಿಸಬೇಕಾಗಿತ್ತು. ಸಾರ್ವಜನಿಕ ಸಾರಿಗೆ ಸಿಗಬೇಕಾದರೆ ಹಲವು ಕಿಲೋಮೀಟರ್‌ ದೂರ ಹೋಗಬೇಕಿತ್ತು.
ಇದೀಗ ಸರ್ಕಾರಿ ಬಸ್ ಸೇವೆ ಆರಂಭವಾಗಿರುವುದರಿಂದ ಹತ್ತಿರದ ಪಟ್ಟಣಗಳು, ಮಾರುಕಟ್ಟೆಗಳು, ಆಸ್ಪತ್ರೆಗಳು, ಶಾಲೆಗಳು ಹಾಗೂ ಸರ್ಕಾರಿ ಕಚೇರಿಗಳಿಗೆ ತೆರಳುವುದು ಸುಲಭವಾಗಲಿದೆ.
ಅದಕ್ಕಾಗಿಯೇ ಮೊದಲ ಬಸ್ ಗ್ರಾಮಕ್ಕೆ ಬಂದ ದಿನವನ್ನು ಜನರು ಐತಿಹಾಸಿಕ ದಿನದಂತೆ ಆಚರಿಸಿದ್ದಾರೆ. ಬಸ್ ಬಂದ ಕೆಲವೇ ಕ್ಷಣಗಳಲ್ಲಿ ಗ್ರಾಮದಲ್ಲಿ ಕಂಡ ಸಂಭ್ರಮದ ವಿಡಿಯೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್‌ ಆಗಿವೆ.
