ಸೌಂದರ್ಯಾ ಕಾಲು ಹಿಡಿದ ಯಶಸ್; ‘ಏನಾಗಿದೆ ಇವನಿಗೆ?’ ಎಂದು ಪ್ರಶ್ನಿಸಿದ ಪ್ರಶಾಂತ್

Bigg Boss Kannada 13: ಬಿಗ್ ಬಾಸ್ ಕನ್ನಡ ಸೀಸನ್ 13ರ ಮನೆಯಲ್ಲಿ ಸ್ಪರ್ಧಿಗಳ ನಡುವಿನ ಮಾತಿನ ಚಕಮಕಿ ಮುಂದುವರಿದಿದೆ. ಇದೀಗ ಯಶಸ್ ಅವರ ವರ್ತನೆ ಮತ್ತು ಸೌಂದರ್ಯಾ ಶೆಟ್ಟಿ ಜೊತೆಗಿನ ಆಪ್ತತೆ ಬಗ್ಗೆ ಜಗದೀಶ್ ಹಾಗೂ ಪ್ರಶಾಂತ್ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ಅಕ್ಟೋಬರ್ 13ರ ಸಂಚಿಕೆಯಲ್ಲಿ ನಡೆದ ಘಟನೆಯೊಂದು ಮನೆಯೊಳಗೆ ಚರ್ಚೆಗೆ ಕಾರಣವಾಗಿದೆ.

ಸೌಂದರ್ಯಾ ಕಾಲು ಹಿಡಿದ ಯಶಸ್!

ಕಾವ್ಯಾ, ಸೌಂದರ್ಯಾ ಶೆಟ್ಟಿ ಮತ್ತು ಯಶಸ್ ಕುಳಿತು ಮಾತನಾಡುತ್ತಿದ್ದರು. ಈ ವೇಳೆ ಕುಳಿತುಕೊಳ್ಳಲು ಕಾಲು ಇಡಲು ಜಾಗವಿಲ್ಲ ಎಂದು ಸೌಂದರ್ಯಾ ಹೇಳಿದ್ದಾರೆ. ಆಗ ಯಶಸ್ ಅವರ ಕಾಲನ್ನು ತಮ್ಮ ಅಂಗೈಯಲ್ಲಿ ಹಿಡಿದುಕೊಂಡಿದ್ದಾರೆ. ಈ ದೃಶ್ಯವನ್ನು ಗಮನಿಸಿದ ಜಗದೀಶ್ ಮತ್ತು ಪ್ರಶಾಂತ್, ಯಶಸ್ ವರ್ತನೆಯ ಬಗ್ಗೆ ಪರಸ್ಪರ ಮಾತನಾಡಿಕೊಂಡಿದ್ದಾರೆ.

‘ಅವಳ ಕಾಲು ಹಿಡಿದುಕೊಂಡಿದ್ದಾನೆ ನೋಡು. ಅಸಹ್ಯ ಎನಿಸುತ್ತದೆ. ಅಯ್ಯೋ ಕಥೆ’ ಎಂದು ಜಗದೀಶ್ ಗೊಣಗಿದ್ದಾರೆ. ಇದಕ್ಕೆ ಪ್ರತಿಕ್ರಿಯಿಸಿದ ಪ್ರಶಾಂತ್, ‘ಏನಾಗಿದೆ ಯಶಸ್‌ಗೆ? ಇದನ್ನೇ ಅವನು ಹೆಮ್ಮೆ ಎಂದುಕೊಂಡಿದ್ದಾನಾ? ಎರಡು ವಾರ ಆದಮೇಲೆ ಆಟ ತೋರಿಸುತ್ತಾನೆ ಅಂತಾನೆ ಅಷ್ಟೇ’ ಎಂದು ಟೀಕಿಸಿದ್ದಾರೆ.

‘ಬರೀ ನೋಡು ಅಂತ ಹೇಳಿದೆ ಅಷ್ಟೇ. ಅವರ ಬಗ್ಗೆ ಮಾತನಾಡಬೇಡ. ಅಸಹ್ಯ ಆಗುತ್ತದೆ’ ಎಂದು ಜಗದೀಶ್ ಖಾರವಾಗಿ ಹೇಳಿದ್ದಾರೆ.

ಇದನ್ನೂ ಓದಿ: Gold-Silver Price: ಚಿನ್ನದ ಬೆಲೆಯಲ್ಲಿ ಬಾರೀ ಕುಸಿತ, ಬೆಳ್ಳಿ ಬೆಲೆ ₹2,500 ಇಳಿಕೆ! ಖರೀದಿದಾರರಿಗೆ ಗುಡ್ ನ್ಯೂಸ್?

ಆಸಿಯಾ ಇಷ್ಟನಾ, ಸೌಂದರ್ಯಾ ಇಷ್ಟನಾ?

ಯಶಸ್ ಅವರ ವರ್ತನೆ ಬಗ್ಗೆ ಮಾತನಾಡುವಾಗ ಪ್ರಶಾಂತ್ ಮತ್ತೊಂದು ಅನುಮಾನವನ್ನೂ ವ್ಯಕ್ತಪಡಿಸಿದ್ದಾರೆ. ‘ನನಗೆ ಅನುಮಾನ ಆಗುತ್ತಿದೆ. ಆಸಿಯಾನ ಯಶಸ್ ಇಷ್ಟಪಡುತ್ತಿದ್ದಾನಾ ಅಥವಾ ಸೌಂದರ್ಯಾನ ಇಷ್ಟಪಡುತ್ತಿದ್ದಾನಾ?’ ಎಂದು ಪ್ರಶ್ನಿಸಿದ್ದಾರೆ. ಆದರೆ ಈ ವಿಚಾರವಾಗಿ ಜಗದೀಶ್ ಹೆಚ್ಚು ಮಾತನಾಡಲು ಆಸಕ್ತಿ ತೋರಿಸಿಲ್ಲ.

ಈ ಹಿಂದೆಯೂ ಯಶಸ್ ಅವರ ವರ್ತನೆ ಬಗ್ಗೆ ಕೆಲವು ಸ್ಪರ್ಧಿಗಳು ಅಸಮಾಧಾನ ವ್ಯಕ್ತಪಡಿಸಿದ್ದರು. ಇದೀಗ ಜಗದೀಶ್ ಮತ್ತು ಪ್ರಶಾಂತ್ ಕೂಡ ಅವರ ನಡವಳಿಕೆಯನ್ನು ಟೀಕಿಸಿರುವುದರಿಂದ ಮನೆಯೊಳಗಿನ ಈ ವಿಚಾರ ಮತ್ತಷ್ಟು ಚರ್ಚೆಗೆ ಬಂದಿದೆ.

ಯಶಸ್‌ಗೆ ಒಂಟಿಯಾಗಿ ಆಟವಾಡುವ ಸಾಮರ್ಥ್ಯ ಇಲ್ಲವೇ?

ಇನ್ನೊಂದೆಡೆ, ಈ ವಾರದ ಟಾಸ್ಕ್‌ಗಾಗಿ ಸ್ಪರ್ಧಿಗಳನ್ನು ಎರಡು ತಂಡಗಳಾಗಿ ವಿಂಗಡಿಸುವ ವಿಚಾರವೂ ಗಮನ ಸೆಳೆದಿದೆ. ಸ್ವತಂತ್ರವಾಗಿ ಆಟವಾಡುವ ಸಾಮರ್ಥ್ಯ ಇರುವವರು ಯಾರು, ಇತರರ ಬೆಂಬಲದ ಅಗತ್ಯವಿರುವವರು ಯಾರು ಎಂಬುದನ್ನು ಕ್ಯಾಪ್ಟನ್ ಧನುಷ್ ನಿರ್ಧರಿಸಿದ್ದಾರೆ.

ಈ ವೇಳೆ ಸೌಂದರ್ಯಾ ಅವರಿಗೆ ಒಬ್ಬಂಟಿಯಾಗಿ ಆಟವಾಡುವ ಸಾಮರ್ಥ್ಯ ಇಲ್ಲ ಎಂದು ಧನುಷ್ ಅಭಿಪ್ರಾಯಪಟ್ಟಿದ್ದಾರೆ. ಯಶಸ್‌ಗೆ ಹಲವು ಬಾರಿ ಅವಕಾಶ ಸಿಕ್ಕಿದ್ದರೂ, ಅವರಿಗೆ ಯಾವಾಗಲೂ ಯಾರಾದರೂ ಒಬ್ಬರ ಬೆಂಬಲ ಬೇಕಾಗುತ್ತದೆ. ಒಂಟಿಯಾಗಿ ಆಟವಾಡುವ ಸಾಮರ್ಥ್ಯ ಅವರಿಗಿಲ್ಲ ಎಂದು ಧನುಷ್ ಹೇಳಿದ್ದಾರೆ.

ಒಟ್ಟಿನಲ್ಲಿ, ಸೌಂದರ್ಯಾ ಜೊತೆಗಿನ ಯಶಸ್ ಅವರ ಆಪ್ತತೆ ಮತ್ತು ಆಟದ ರೀತಿಯ ಬಗ್ಗೆ ಬಿಗ್ ಬಾಸ್ ಮನೆಯಲ್ಲಿ ಚರ್ಚೆ ಜೋರಾಗಿದೆ. ಮುಂದಿನ ದಿನಗಳಲ್ಲಿ ಈ ವಿಚಾರ ಸ್ಪರ್ಧಿಗಳ ನಡುವಿನ ಸಂಬಂಧ ಹಾಗೂ ಆಟದ ಮೇಲೆ ಯಾವ ರೀತಿಯ ಪರಿಣಾಮ ಬೀರುತ್ತದೆ ಎಂಬುದನ್ನು ಕಾದು ನೋಡಬೇಕಿದೆ.

ಇದನ್ನೂ ಓದಿ: Vastu Tips: ಈ 5 ಸ್ಥಳಗಳಲ್ಲಿ ಹಣ ಇಡಬೇಡಿ! ಆರ್ಥಿಕ ಸಮಸ್ಯೆ ಎದುರಾಗುತ್ತಂತೆ, ವಾಸ್ತು ಶಾಸ್ತ್ರ ಹೇಳುವುದೇನು?