ಒಂದು ವರ್ಷ UPI ಬಳಕೆ ಮಾಡದಿದ್ರೆ ಎಷ್ಟು ಹಣ ಉಳಿತಾಯ ಆಗುತ್ತೆ ಗೊತ್ತಾ?

ಇಂದಿನ ಡಿಜಿಟಲ್ ಯುಗದಲ್ಲಿ UPI ನಮ್ಮ ದೈನಂದಿನ ಜೀವನದ ಪ್ರಮುಖ ಭಾಗವಾಗಿದೆ. ತರಕಾರಿ ಖರೀದಿಸುವುದರಿಂದ ಹಿಡಿದು ಶಾಪಿಂಗ್, ಊಟ, ಪ್ರಯಾಣದವರೆಗೆ ಬಹುತೇಕ ಎಲ್ಲ ಪಾವತಿಗಳನ್ನೂ ಕೆಲವೇ ಸೆಕೆಂಡ್‌ಗಳಲ್ಲಿ ಮಾಡಬಹುದು.

ಆದರೆ UPI ಪಾವತಿಯ ಈ ಸುಲಭತೆ ಕೆಲವೊಮ್ಮೆ ಸಣ್ಣ-ಸಣ್ಣ ಅನಗತ್ಯ ಖರ್ಚುಗಳಿಗೆ ಕಾರಣವಾಗಬಹುದು. ಕೈಯಿಂದ ನಗದು ಕೊಡುವಾಗ ಯೋಚಿಸುವಷ್ಟು, ಮೊಬೈಲ್‌ನಲ್ಲಿ ₹10, ₹20, ₹50 ಪಾವತಿ ಮಾಡುವಾಗ ನಾವು ಅಷ್ಟಾಗಿ ಗಮನ ಕೊಡದೇ ಇರಬಹುದು.

ದಿನಕ್ಕೆ ₹200 ಖರ್ಚಾದರೆ ವರ್ಷಕ್ಕೆ ಎಷ್ಟು?

ಒಬ್ಬ ವ್ಯಕ್ತಿ UPI ಮೂಲಕ ದಿನಕ್ಕೆ ಸರಾಸರಿ ₹200 ಖರ್ಚು ಮಾಡುತ್ತಾನೆ ಎಂದುಕೊಳ್ಳಿ. ಆಗ ತಿಂಗಳಿಗೆ ಸುಮಾರು ₹6,000 ಮತ್ತು ವರ್ಷಕ್ಕೆ ಸುಮಾರು ₹72,000 ಖರ್ಚಾಗುತ್ತದೆ.

ಈ ಖರ್ಚಿನಲ್ಲಿರುವ ಶೇ.15ರಿಂದ 20ರಷ್ಟು ಹಣವು ಹಠಾತ್ ಖರೀದಿ ಅಥವಾ UPI ಪಾವತಿಯ ಸುಲಭತೆಯಿಂದಾಗುವ ಅನಗತ್ಯ ವೆಚ್ಚ ಎಂದು ಅಂದಾಜಿಸಿದರೆ, ತಿಂಗಳಿಗೆ ಸುಮಾರು ₹900ರಿಂದ ₹1,200 ಉಳಿಸಬಹುದು.

ಅಂದರೆ ಒಂದು ವರ್ಷದಲ್ಲಿ ಸುಮಾರು ₹10,800ರಿಂದ ₹14,400ವರೆಗೆ ಉಳಿಸುವ ಸಾಧ್ಯತೆ ಇದೆ.

UPI ಸಂಪೂರ್ಣವಾಗಿ ಬಿಟ್ಟುಬಿಡಬೇಕಾ?

ಇದರಿಂದ UPI ಬಳಸುವುದೇ ತಪ್ಪು ಎಂದರ್ಥವಲ್ಲ. UPI ಪಾವತಿಗಳು ವೇಗವಾಗಿ ಮತ್ತು ಸುಲಭವಾಗಿ ಹಣ ಪಾವತಿಸಲು ಸಹಾಯ ಮಾಡುತ್ತವೆ. ಹೀಗಾಗಿ UPI ಸಂಪೂರ್ಣವಾಗಿ ಬಂದ್ ಮಾಡುವ ಬದಲು ಖರ್ಚಿಗೆ ಮಿತಿ ಹಾಕುವುದು ಹೆಚ್ಚು ಪ್ರಾಯೋಗಿಕ ವಿಧಾನ.

ದಿನಸಿ, ಪ್ರಯಾಣ, ಬಿಲ್‌ಗಳಂತಹ ಅಗತ್ಯ ವೆಚ್ಚಗಳಿಗೆ UPI ಬಳಸಬಹುದು. ಆದರೆ ಆನ್‌ಲೈನ್ ಶಾಪಿಂಗ್, ಹೊರಗೆ ಊಟ ಮಾಡುವುದು ಮತ್ತು ಇತರ ಅನಗತ್ಯ ಖರೀದಿಗಳಿಗೆ ವಾರ ಅಥವಾ ತಿಂಗಳ ಮಿತಿಯನ್ನು ನಿಗದಿಪಡಿಸಬಹುದು.

ಸಣ್ಣ ಖರ್ಚುಗಳ ಮೇಲೆ ಕಣ್ಣಿರಲಿ

₹10, ₹20, ₹50 ಎಂದು ಸಣ್ಣ ಮೊತ್ತಗಳನ್ನು ನಿರ್ಲಕ್ಷಿಸಿದರೆ ತಿಂಗಳ ಕೊನೆಯಲ್ಲಿ ದೊಡ್ಡ ಮೊತ್ತವಾಗಬಹುದು. ಪ್ರತಿಯೊಂದು UPI ಪಾವತಿಯನ್ನೂ ಟ್ರ್ಯಾಕ್ ಮಾಡುವ ಅಭ್ಯಾಸ ಬೆಳೆಸಿಕೊಂಡರೆ ಅನಗತ್ಯ ಖರ್ಚು ಎಲ್ಲಿ ಆಗುತ್ತಿದೆ ಎಂಬುದು ಸುಲಭವಾಗಿ ಗೊತ್ತಾಗುತ್ತದೆ.

ಹೀಗಾಗಿ UPI ಬಿಟ್ಟುಬಿಡುವುದಕ್ಕಿಂತ, UPI ಮೂಲಕ ಮಾಡುವ ಖರ್ಚಿನ ಮೇಲೆ ಕಂಟ್ರೋಲ್ ಇಡುವುದು ಹಣ ಉಳಿಸಲು ಹೆಚ್ಚು ಸಹಾಯ ಮಾಡಬಹುದು.