ನವದೆಹಲಿ: ಮಕ್ಕಳಾಗುತ್ತಿಲ್ಲ ಎಂದು ತಪಾಸಣೆಗೆ ತೆರಳಿದ್ದ 24 ವರ್ಷದ ಯುವಕನ ದೇಹದಲ್ಲಿ ಸಂಪೂರ್ಣವಾಗಿ ಬೆಳೆದ ಗರ್ಭಕೋಶ ಪತ್ತೆಯಾಗಿರುವ ಅಪರೂಪದ ಪ್ರಕರಣವೊಂದು ಬೆಳಕಿಗೆ ಬಂದಿದೆ. ಸಂತಾನೋತ್ಪತ್ತಿ ಸಮಸ್ಯೆಗಾಗಿ ನಡೆಸಿದ ಪರೀಕ್ಷೆಗಳ ವೇಳೆ ಈ ವಿಚಿತ್ರ ವೈದ್ಯಕೀಯ ಸ್ಥಿತಿ ಪತ್ತೆಯಾಗಿದೆ.
ನೋಡಲು ಯುವಕ ಸಾಮಾನ್ಯ ಪುರುಷನಂತೆಯೇ ಇದ್ದ. ಯಾವುದೇ ವಿಶೇಷ ಲಕ್ಷಣಗಳೂ ಇರಲಿಲ್ಲ. ಆದರೆ ವೈದ್ಯರು ಪರೀಕ್ಷೆ ನಡೆಸಿದಾಗ ವೃಷಣಗಳು ಸಾಮಾನ್ಯವಾಗಿ ಇರಬೇಕಾದ ಜಾಗದಲ್ಲಿ ಕಂಡುಬಂದಿಲ್ಲ. ವೀರ್ಯ ಪರೀಕ್ಷೆಯಲ್ಲೂ ವೀರ್ಯಾಣುಗಳು ಪತ್ತೆಯಾಗಿರಲಿಲ್ಲ.
ಹೀಗಾಗಿ ವೈದ್ಯರು ಕ್ರೋಮೋಸೋಮ್ ಟೆಸ್ಟ್, ಹಾರ್ಮೋನ್ ಟೆಸ್ಟ್ ಸೇರಿದಂತೆ ಹಲವು ಪರೀಕ್ಷೆಗಳನ್ನು ಮಾಡಿಸಿದ್ದಾರೆ.
ಸ್ಕ್ಯಾನಿಂಗ್ನಲ್ಲಿ ಬಯಲಾಯ್ತು ಅಚ್ಚರಿ!
ಅಲ್ಟ್ರಾಸೌಂಡ್ ಮತ್ತು MRI ಸ್ಕ್ಯಾನ್ ಮಾಡಿದಾಗ ಯುವಕನ ದೇಹದೊಳಗೆ ಸಂಪೂರ್ಣವಾಗಿ ಬೆಳೆದ ಗರ್ಭಕೋಶ ಇರುವುದು ಪತ್ತೆಯಾಗಿದೆ. ಎರಡೂ ವೃಷಣಗಳು ಕೂಡ ಹೊಟ್ಟೆಯ ಒಳಭಾಗದಲ್ಲೇ ಉಳಿದುಕೊಂಡಿರುವುದು ಕಂಡುಬಂದಿದೆ.
ಕ್ರೋಮೋಸೋಮ್ ಪರೀಕ್ಷೆಯಲ್ಲಿ ಯುವಕ XY ಕ್ರೋಮೋಸೋಮ್ ಹೊಂದಿರುವುದು ದೃಢಪಟ್ಟಿದೆ. ಅಂದರೆ ಕ್ರೋಮೋಸೋಮ್ ದೃಷ್ಟಿಯಿಂದ ಪುರುಷನಾಗಿದ್ದರೂ, ದೇಹದೊಳಗೆ ಗರ್ಭಕೋಶದಂತಹ ಹೆಣ್ಣು ಸಂತಾನೋತ್ಪತ್ತಿ ಅಂಗ ಬೆಳವಣಿಗೆಯಾಗಿತ್ತು.
ಇದಕ್ಕೆ ಕಾರಣ ಏನು?
ವೈದ್ಯಕೀಯವಾಗಿ ಇದನ್ನು Persistent Müllerian Duct Syndrome (PMDS) ಎಂದು ಕರೆಯಲಾಗುತ್ತದೆ. ಇದು ಬಹಳ ಅಪರೂಪದ ಲೈಂಗಿಕ ಬೆಳವಣಿಗೆಗೆ ಸಂಬಂಧಿಸಿದ ಸ್ಥಿತಿಯಾಗಿದೆ.
ಸಾಮಾನ್ಯವಾಗಿ ಗಂಡು ಭ್ರೂಣ ಬೆಳೆಯುವಾಗ ವೃಷಣಗಳಿಂದ Anti-Müllerian Hormone (AMH) ಎಂಬ ಹಾರ್ಮೋನ್ ಬಿಡುಗಡೆಯಾಗುತ್ತದೆ. ಈ ಹಾರ್ಮೋನ್ನಿಂದ ಗರ್ಭಕೋಶ ಮತ್ತು ಫಾಲೋಪಿಯನ್ ಟ್ಯೂಬ್ಗಳಂತಹ ರಚನೆಗಳು ಬೆಳೆಯದಂತೆ ದೇಹದಲ್ಲಿ ಬದಲಾವಣೆ ಆಗುತ್ತದೆ.
ಆದರೆ ಕೆಲವರಲ್ಲಿ AMH ಸರಿಯಾಗಿ ಉತ್ಪತ್ತಿಯಾಗದಿದ್ದರೆ ಅಥವಾ ದೇಹದ ಕೋಶಗಳು ಈ ಹಾರ್ಮೋನ್ಗೆ ಸರಿಯಾಗಿ ಪ್ರತಿಕ್ರಿಯಿಸದಿದ್ದರೆ, ಸಾಮಾನ್ಯವಾಗಿ ಮಾಯವಾಗಬೇಕಿದ್ದ Müllerian duct ರಚನೆಗಳು ದೇಹದಲ್ಲಿ ಉಳಿದುಕೊಳ್ಳಬಹುದು. ಇದರಿಂದ ಗರ್ಭಕೋಶದಂತಹ ಅಂಗಗಳು ಬೆಳೆಯಬಹುದು.
ವೃಷಣಗಳು ಹೊಟ್ಟೆಯಲ್ಲಿದ್ದರೆ ಸಮಸ್ಯೆ ಏನು?
ವೀರ್ಯಾಣುಗಳ ಉತ್ಪಾದನೆಗೆ ವೃಷಣಗಳಿಗೆ ದೇಹದ ಒಳಗಿನ ತಾಪಮಾನಕ್ಕಿಂತ ಕಡಿಮೆ ತಾಪಮಾನ ಬೇಕಾಗುತ್ತದೆ. ಆದರೆ ವೃಷಣಗಳು ಹೊಟ್ಟೆಯೊಳಗೆ ಉಳಿದುಕೊಂಡರೆ ಹೆಚ್ಚಿನ ತಾಪಮಾನದಿಂದಾಗಿ ವೀರ್ಯಾಣು ಉತ್ಪಾದನೆ ಕಡಿಮೆಯಾಗಬಹುದು ಅಥವಾ ಸಂಪೂರ್ಣವಾಗಿ ನಿಲ್ಲಬಹುದು.
ಇದರ ಜೊತೆಗೆ ವೀರ್ಯ ಹೊರಬರುವ ದಾರಿಯಲ್ಲಿ ಸಮಸ್ಯೆ ಅಥವಾ ಹಾರ್ಮೋನ್ಗಳ ಏರುಪೇರು ಕೂಡ ಸಂತಾನೋತ್ಪತ್ತಿ ಸಮಸ್ಯೆಗೆ ಕಾರಣವಾಗಬಹುದು.
ಮಕ್ಕಳಾಗಲು ಸಾಧ್ಯವಿಲ್ಲವೇ?
PMDS ಇದ್ದರೆ ಮಕ್ಕಳಾಗುವುದೇ ಸಾಧ್ಯವಿಲ್ಲ ಎಂದು ನೇರವಾಗಿ ಹೇಳಲು ಸಾಧ್ಯವಿಲ್ಲ. ವೃಷಣಗಳ ಕಾರ್ಯ ಮತ್ತು ವೀರ್ಯಾಣು ಉತ್ಪಾದನೆ ಹೇಗಿದೆ ಎಂಬುದರ ಮೇಲೆ ಇದು ಅವಲಂಬಿತವಾಗಿರುತ್ತದೆ.
ವೀರ್ಯಾಣುಗಳು ಕಡಿಮೆ ಪ್ರಮಾಣದಲ್ಲಿದ್ದರೆ ಅಥವಾ ನೈಸರ್ಗಿಕವಾಗಿ ಲಭ್ಯವಾಗದಿದ್ದರೆ, ಕೆಲವು ಸಂದರ್ಭಗಳಲ್ಲಿ ವೈದ್ಯರು ವೃಷಣದಿಂದಲೇ ವೀರ್ಯಾಣುಗಳನ್ನು ಸಂಗ್ರಹಿಸಿ IVF ಅಥವಾ ICSI ಮೂಲಕ ಸಂತಾನೋತ್ಪತ್ತಿಗೆ ಪ್ರಯತ್ನಿಸಬಹುದು.
ಗಮನಿಸಿ: PMDS ಬಹಳ ಅಪರೂಪದ ವೈದ್ಯಕೀಯ ಸ್ಥಿತಿಯಾಗಿದ್ದು, ಪ್ರತಿಯೊಬ್ಬರಲ್ಲೂ ಲಕ್ಷಣಗಳು ಮತ್ತು ಸಂತಾನೋತ್ಪತ್ತಿ ಸಾಮರ್ಥ್ಯ ಒಂದೇ ರೀತಿ ಇರುವುದಿಲ್ಲ. ಸೂಕ್ತ ಪರೀಕ್ಷೆ ಮತ್ತು ತಜ್ಞ ವೈದ್ಯರ ಸಲಹೆ ಅಗತ್ಯ.
