ನವದೆಹಲಿ: UPI ಬಳಸುವವರಿಗೆ ಬಿಗ್ ಅಪ್ಡೇಟ್ ಬಂದಿದೆ. ₹2,000ಕ್ಕಿಂತ ಹೆಚ್ಚಿನ ಮೊತ್ತದ Person-to-Merchant (P2M) UPI ಪಾವತಿಗಳಿಗೆ ಅಕ್ಟೋಬರ್ 15, 2026ರಿಂದ 0.4% Merchant Discount Rate (MDR) ಅನ್ವಯವಾಗಲಿದೆ ಎಂದು NPCI ಘೋಷಿಸಿದೆ. ಪ್ರತಿ ವಹಿವಾಟಿಗೆ ಈ ಶುಲ್ಕ ಗರಿಷ್ಠ ₹300ಕ್ಕೆ ಸೀಮಿತವಾಗಿರುತ್ತದೆ.
ಆದ್ರೆ ಇಲ್ಲಿ ಒಂದು ಮುಖ್ಯ ವಿಷಯ ಇದೆ. ಈ ಶುಲ್ಕವನ್ನು ಸಾಮಾನ್ಯ ಗ್ರಾಹಕರಿಂದ ನೇರವಾಗಿ ವಸೂಲಿ ಮಾಡುವ ನಿಯಮ ಅಲ್ಲ. MDR ಮುಖ್ಯವಾಗಿ ವ್ಯಾಪಾರಿಗಳ ಮೇಲಿನ ಶುಲ್ಕವಾಗಿದೆ. ಅಂದರೆ ನೀವು ಅಂಗಡಿಯಲ್ಲಿ ₹3,000 ಅನ್ನು UPI ಮೂಲಕ ಪಾವತಿಸಿದರೆ, 0.4% ಅಂದರೆ ₹12 MDR ವ್ಯಾಪಾರಿ ವಹಿಸಬೇಕಾಗುತ್ತದೆ.
₹75,000 ಪಾವತಿಸಿದರೆ ಎಷ್ಟು?
₹75,000 ಅಥವಾ ಅದಕ್ಕಿಂತ ಹೆಚ್ಚಿನ ಸಾಮಾನ್ಯ ವ್ಯಾಪಾರಿ UPI ವಹಿವಾಟಿಗೆ 0.4% ಲೆಕ್ಕದಲ್ಲಿ ಬಂದರೂ MDR ಗರಿಷ್ಠ ₹300 ಮಾತ್ರ ಇರಲಿದೆ. ಹೀಗಾಗಿ ದೊಡ್ಡ ಮೊತ್ತದ ಪಾವತಿಗಳಲ್ಲೂ ಈ ಶುಲ್ಕಕ್ಕೆ ಮಿತಿ ಇರುತ್ತದೆ.
ರೈಲ್ವೆ, ಟೆಲಿಕಾಂ, ಇಂಧನಕ್ಕೆ ₹5!
ಎಲ್ಲಾ ಕ್ಷೇತ್ರಗಳಿಗೂ ಒಂದೇ ರೀತಿಯ 0.4% ಶುಲ್ಕ ಇರುವುದಿಲ್ಲ. ರೈಲ್ವೆ, ಟೆಲಿಕಾಂ, ವಿಮೆ, ಇಂಧನ ಮತ್ತು ಕೆಲವು ನಿರ್ದಿಷ್ಟ ವ್ಯಾಪಾರಿ ವಿಭಾಗಗಳಲ್ಲಿ ₹2,000ಕ್ಕಿಂತ ಹೆಚ್ಚಿನ UPI ಪಾವತಿಗಳಿಗೆ ಪ್ರತಿ ವಹಿವಾಟಿಗೆ ₹5ರ ಫ್ಲ್ಯಾಟ್ MDR ನಿಗದಿಪಡಿಸಲಾಗಿದೆ.
ಕಡಿಮೆ ಲಾಭಾಂಶ ಇರುವ ಅಗತ್ಯ ಸೇವೆಗಳಲ್ಲಿ ಡಿಜಿಟಲ್ ಪಾವತಿಗಳ ವೆಚ್ಚ ಹೆಚ್ಚಾಗದಂತೆ ಈ ಪ್ರತ್ಯೇಕ ದರದ ವ್ಯವಸ್ಥೆ ಮಾಡಲಾಗಿದೆ ಎಂದು NPCI ತಿಳಿಸಿದೆ.
₹2,000ವರೆಗೆ UPI ಪಾವತಿ ಫ್ರೀಕೇಂದ್ರ ಸರ್ಕಾರದ ಅಧಿಸೂಚನೆಯ ಪ್ರಕಾರ, ₹2,000ವರೆಗಿನ UPI ಪಾವತಿಗಳ ಮೇಲೆ ಬ್ಯಾಂಕ್ ಅಥವಾ ಪೇಮೆಂಟ್ ಸಿಸ್ಟಮ್ ಪ್ರೊವೈಡರ್ ಯಾವುದೇ ನೇರ ಅಥವಾ ಪರೋಕ್ಷ ಶುಲ್ಕ ವಿಧಿಸುವಂತಿಲ್ಲ. RuPay ಡೆಬಿಟ್ ಕಾರ್ಡ್ ಪಾವತಿಗಳಿಗೂ ಈ ಶುಲ್ಕ ವಿನಾಯಿತಿ ಮುಂದುವರಿಯಲಿದೆ.
ವ್ಯಕ್ತಿಯಿಂದ ವ್ಯಕ್ತಿಗೆ UPI ಪಾವತಿ?
ಇಲ್ಲಿ ಮತ್ತೊಂದು ರಿಲೀಫ್ ಇದೆ. Person-to-Person (P2P) UPI ಪಾವತಿಗಳು ಯಾವುದೇ ಮೊತ್ತವಾಗಿದ್ದರೂ ಉಚಿತವಾಗಿಯೇ ಮುಂದುವರಿಯಲಿವೆ. ಹೊಸ MDR ನಿಯಮವು ಮುಖ್ಯವಾಗಿ ವ್ಯಕ್ತಿಯಿಂದ ವ್ಯಾಪಾರಿಗೆ ಮಾಡುವ P2M ಪಾವತಿಗಳಿಗೆ ಅನ್ವಯಿಸುತ್ತದೆ.
ಅಂದರೆ ಸ್ನೇಹಿತರಿಗೆ, ಕುಟುಂಬದವರಿಗೆ ಅಥವಾ ಮತ್ತೊಬ್ಬ ವ್ಯಕ್ತಿಗೆ ಹಣ ಕಳುಹಿಸುವಾಗ ₹2,000ಕ್ಕಿಂತ ಹೆಚ್ಚಿನ ಮೊತ್ತವಿದೆ ಎಂಬ ಕಾರಣಕ್ಕೆ ಹೊಸ MDR ಶುಲ್ಕ ಬರುವುದಿಲ್ಲ.
ಕೇಂದ್ರ ಸರ್ಕಾರ ಕೂಡ “UPI ಬಳಕೆದಾರರಿಗೆ ಯಾವುದೇ ಶುಲ್ಕ ಇರುವುದಿಲ್ಲ” ಎಂದು ಸ್ಪಷ್ಟಪಡಿಸಿದ್ದು, ಹೊಸ MDR ವ್ಯವಸ್ಥೆ ಸೀಮಿತ ವ್ಯಾಪಾರಿ ವಹಿವಾಟುಗಳಿಗೆ ಮಾತ್ರ ಅನ್ವಯಿಸುತ್ತದೆ ಎಂದು ಹೇಳಿದೆ.
